SOMCABLE

Xildhibaan Baarlamaanka Hortiisa Kaga Dhawaaqay Inuu Qabo Cudurka HIV AIDS-ka

London, 2 Dismeembar, 2018 (Himilo) – Mudane ka tirsan aqalka hoose ee baarlamaanka dalka Ingiriiska ayaa shaaca ka qaaday inuu qabo cudurka HIV AIDS, xilli uu aqalka ka doodayay arrin ku saabsan caafimaadka dadweynaha.

Lloyd Russell-Moyle, oo ah xildhibaanka xisbiga shaqaalaha ee laga soo doortay degmada Brighton Kemptown, ayaa noqday mudanihii ugu horreeyay ee xaaladdiisa ku saabsan cudurka HIV-ga kaga dhawaaqa gudaha baarlamaanka hoose, wuxuuna noqday xildhibaankii labaad ee sheega inuu la nool yahay xanuunkaas.

Wuxuu sheegay inuu dareemay sidii inuu ku khasbanaa ka hadalka arrin isaga shakhsi ahaan u saameysay.

Mr Russell-Moyle ayaa ku boorriyay wasiirrada iney dib u eegis ku sameeyaan go’aanka wax lagaga dhimayo miisaaniyadda loogu tala galay caafimaadka dhinaca galmada.

Wuxuu xildhibaannada aqalka hoose u sheegay in sannadka soo socda uu u noqon doono sannadkiisii 10-aad ee uu la noolyahay cudurka HIV-ga.

“Markii aan ogaanayay inaan xanuunkaas qabo waxay igu ahayd “argagax dhab ah” laakiin ma ayna ahayn dhammaadkii dunida, inkastoo dhowr ilbidhiqsi ay sidaas kula noqoneyso” ayuu yidhi Mr Russell-Moyle, oo 32 sano jir ah.

Isagoo hadalkiisa sii wata ayuu intaas ku daray: “Wuxuu ahaa safar dheer, laga soo billaabo markii aan niyad ahaan u aqbali waayay ilaa Maanta oo aan ahay qof u dooda dadka xanuunkaas qaba, anigoo og in daaweynta la ii sameeyo ay gacan weyn ka geysato xaaladdeyda caafimaad, taasoo sidoo kale ilaalisa qof walba oo lamaane ila noqda”.

Xildhibaanka ayaa sidoo kale la hadlay dadka xanuunkiisa oo kale qaba “Ugu dambeyn waxaan rabay iney ii suurta gasho inaan halkan soo istaago una sheego dadka kale ee la nool HIV AIDS-ka in cudurkooda aanu astaan u ahayn”ayuu yidhi, waxaanu intaa sii raaciyey “Waxaan gaadhi karnaa heer walba oo aan dooneyno, dadka ka cabsanaya iney cudurka iska baadhaan iyagana waxaan leeyahay, waxaa habboon inaad la noolaato wax aad ogtahay intii aad la dhiman lahayd cabsi”.

Xildhibaankan ayaa sheegay in ku dhawaaqista arrintiisa uu doortay inuu ku soo beego maalinta Aids-ka adduunka oo ku asteysan 1-da Bisha 12-aad, 2018.

Sannadkii 2005-tii ayuu xildhibaan ka tirsanaa xisbiga shaqaalaha oo lagu magacaabo Chris Smith ku shaaciyay wargeys inuu muddo 17 sano ah qabay cudurka HIV-Adids-ka.

Himilomedia.com

Hargeysa-Somaliland

Leave a Reply