SOMCABLE

War-saxaafadeed: Tirada Maxaabiis Uu Madaxweynaha Somaliland Cafis U Fidiyey Maanta

Hargeysa (Himilo) – Madaxweynaha Somaliland Md. Muuse Biixi Cabdi, ayaa Munaasibadda Ciidal-fidriga awgeed Cafis u fidiyey Maxaabiis Tiradoodu dhan tahay 511, kuwaasi oo ku xukunaa Dambiyo fudud oo ay geysteen.

Madaxweyne MBC

Sidaana waxa lagu sheegay War-saxaafadeed lagu faahfaahiyey Wareegtada Madaxweynaha ee Cafiska Madaxweynuhu ugu fidiyey Maxaabiista, kaasi oo nuqul ka mid ah oo soo gaadhay Himilomedia.com u dhignaa sidan:-

WAR-SAXAAFADEED

Madaxweynaha Jamhuuriyadda Somaliland, Mudane Muuse Biixi Cabdi waxa uu munaasibadda ciidal fidriga awgeed wareegto Madaxweyne oo sumadeedu tahay JSL/XM/WM/222-113/062018 uu cafis u fidiyey Maxaabiista dembiyada fudud ku xukuman ee xabsiyada dalka ku xidhan, oo tiradoodu dhan tahay 511 (Shan Boqol iyo Kow iyo Toban) maxbuus, waxaanay u dhignayd wareegtada Madaxweynuhu sidan:-

Wareegto Madaxweyne

Cafis

Markaan Arkay:  Dastuurka Jamhuuriyadda Somaliland, Qodobka 90aad, Xubintiisa 5aad;

Markaan Arkay: Xeerka Ciqaabta Guud, Qodobkiisa 149aad;

Markaan Tixgaliyey:  In Cafis Loo Fidiyo Maxaabiista Dembiyada Fudud ku Xukuman, Munaasibaadda Ciidal Fidrida awgeed ee sannadka 1439 ee Hijriyda, kuna beegan 2018;

Markaan La-tashaday:  Hay’adaha ay Khusayso;

Waxaan Go’aansaday;

In laga bilaabo taariikhda Maanta aan cafis buuxa u fidiyo Maxaabiista dembiyada fudud ku xukuman ee xabsiyada dalka ku xidhan, oo tiradoodu dhan tahay 511 (Shan Boqol iyo Kow iyo Toban) maxbuus.

Cafiskani saamayn kuma laha xuquuqda madaniga iyo raadka ciqaabeed ee ka dhashay dembiyada ay ku xukunnaayeen, sida ku xusan qodobka 92 ee Xeerka Ciqaabta Guud.

Waxa cafiskan fulinaya Xafiiska Xeer Ilaaliyaha Guud ee Qaranka, iyada oo la raacayo liiska Maxaabiista Wareegtadan ku lifaaqan…”

ALLAA MAHAD LEH

 Muuse Biixi Cabdi

Madaxweynaha Jamhuuriyadda Somaliland

Leave a Reply