SOMCABLE

Ujeeddada Shir Ay Hargeysa Ku Yeesheen Wasaaradda Beeraha, Midowga Yurub Iyo Hay’adda Cuntada Adduunka Ee FAO

 

Hargeysa,  8 Feebarweri, 2018 (Himilo) – Wasiirka horumarinta beeraha Somaliland Mudane Axmed Muumin Seed, ayaa shir uu la yeeshay Masuuliyiin ka socotay Midawga Yurub iyo Hay’adda Qaramada Midoobay u qaabilsan Cuntada ee FAO, waxayna kaga wada hadleen sidii ay uga qayb qaadan lahaayeen ololaha loogu jiro sidii dalka loogu soo saari lahaa cunto ku filan.

Shirkan ayaa waxa khudbad furitaan ka jeediyey Wasiirka horumarinta beeraha Somaliland Mudane Axmed Muumin Seed, isaga oo tilmaamay inuu soo dhaweynayo tallaabooyinka wax lagaga qabanayo qabashada biyaha iyo ciidda oo ka qayb noqon doonta kobcinta wax soo saarka dalka.

Shirkan oo Shalay ka qabsoomay Huteelka Maansoor ee magaalada Hargeysa ayaa waxa lagu falanqeeyey sidii ay labada dhinac uga qayb qaadaan lahaayeen wax ka qabashada caqabadaha hor taagan wax soo saarka dhanka cuntada oo ay ugu horeeyaan qabashada Ciidda iyo Biyaha, iyada oo lagu soo qaaday sidii ay u dar-dar galin lahaayeen Mashaariicda ay Hay’adda FAO iyo Midawga Yurub ka wadaan Deegaanka Beerato ee gobolka Togdheer laguna dhisayo Kanaalo beeraha halkaasi ku yaala biyaha ugu duwayaan.

Weftiga ka socday Midawga Yurub ayaa waxa horkacayey Madaxa Barnaamijyada qaabilsan Somaliland iyo Soomaaliya Martiono Vince, dhanka Hay’adda Qaramada Midoobay u qaabilsan Cuntada ayaa isna waxa ka socday Sergio Innocente oo ah Madaxa Barnaamijyada Hay’adda FAO u qaabilsan Somaliland iyo Soomaaliya.

Wasiirka horumarinta Beeraha Somaliland ayaa waxa isna dhankiisa ku wehelinayey shirkan Agaasimaha Guud ee Wasaaradda Beeraha Maxamed Cilmi Aadan (Ilkacase), Agaasimaha Waaxda Barnaamijyada Wasaaradda Beeraha Ibraahim Cumar Kaahin, Agaasimaha Waaxda Badbaadada Beeraha Maxamed Siciid (Sudani), Agaasimaha Waaxda Gaadiidka Ibraahim Carab Ceelaabe, Isuduwaha Gobolka Togdheer ee Wasaaradda Beeraha Maxamed Cabdi Maxamuud (Gurey) iyo Masuuliyiin kale.

Leave a Reply