SOMCABLE

Soomaaliya: Madaxweynaha Cusub Ee Maamul Gobolleedka Koonfur-galbeed Oo Loo Doortay Siyaasi Farmaajo Taageerayay

Baydhabo (Himilo) – Xildhibaannada Baarlamaanka ee Maamul-gobolleedka Koonfur-galbeed ee Soomaaliya ayaa Maanta Madaxweynaha Maamulkaa u doortay Cabdi Casiis Xassan Maxamed (Lafta –Gareen), kaasi oo ka mid ahaa Musharraxiintii taageerada ka haystay Madaxweyne Farmaajo.

Madaxweynaha la doortay ayaa  helay wareeggii koowaad 101 cod oo noqoneysa guushii ugu ballaadhneyd oo musharax Madaxweyne maamul gobolleed uu wareega horeba gaadho doorashada.

Cabdicasiis Xassan Maxamed oo ku magac dheer Laftagareen Wuxuu ku dhashay degmada Luuq ee gobolka Gedo, sanadkii 1970.

Wuxuu leeyahay hal xaas iyo saddex carruur ah, Waxbarashadiisii dugsiga hoose, dhexe iyo sare wuxuu ku qaatay isla degmada Luuq, Wuxuu Luuq ka ahaa macallin iskuul, Magaalada Muqdisho ayuu jaamacad ka dhigtay, Xilal badan ayuu na dowladihii dalka soo maray ka soo qabtay.

Sanadkii 2007 wuxuu  ahaa maamule ku xigeenkii Dekedda Xamar, Sanadkii 2008 wuxuu xukuumaddii raysal wasaare Nuur Cadde ka soo noqday wasiirka shaqada iyo arrimaha bulshada. Sanadkii 2009 wuxuu xukuumaddii Cumar Cabdirashiid ka noqday wasiirka gaadiidka iyo arrimaha badda.

Isla xukuumaddii Cumar Cabdirashiid wuxuu sanadkii 2010 ka noqday wasiirka xannaanada xoolaha. Xukuumaddii raysal wasaare Maxamed Cabdullaahi Farmaajo wuxuu noqday wasiiru dowlaha boostada, isgaarsiinta iyo warfaafinta.

Xukuumaddii Cabdiweli Sheekh Axmed wuxuu noqday wasiir ku xigeenka kalluumeysiga. Xukuumadda raysal wasaare Xasan Cali Kheyrre wuxuu ka noqday wasiiru dowlaha wasaaradda ganacsiga.

Wuxuu u tartamay guddoomiye baarlamaan. Wuxuu noqday wasiirka tamarta iyo kheyraadka biyaha.

Cabdicasiis Xassan Maxamed (Laftagareen) ayaa ku guuleystay doorashada madaxtinimada ee maamulka Koonfur Galbeed, wuxuuna helay codad gaadhayo 101 cod halka musharraxii ku soo xigay Aadan Maxamed Nuur Saransoor uu helay 22 cod.

Musharraxan ayaa waxa uu taageero ka helay Dawladda dhexe ee Soomaaliya, taasi oo xoog kaga reebtay Musharrixii ugu Cadcaddaa doorashada Koonfur-galbeed, kaasi oo ahaa Mukhtaar Rooboow oo Dawladdu hadda ku hayso xabsi ku yaalla Magaalada Muqdisho, ka dib markii Toddobaadkii hore laga soo xidhay Magaalada Muqdisho.

Himilomedia.com/Hargeisa Office

Leave a Reply