SOMCABLE

Madaxweyne Biixi Oo Ergay Turkigu U Soo Magacaabay Wada-hadallada Somaliland Iyo Soomaaliya U Sheegay Inaan Deeqaha Dawladdiisu Bixiso Loo Sinayn

Hargeysa, 10 Feebarweri, 2019 (Himilo) – Madaxweynaha Somaliland, Md.  Muuse Biixi Cabdi ayaa Shalay Qasriga Madaxtooyada ku qaabilay Ergayga Dawladda Turkigu u soo Magacowday Wada-hadallada Somaliland iyo Soomaaliya, kaasi oo booqasho ku yimid Hargeysa.

Sidaana waxa lagu sheegay War-saxaafadeed Afhayeenka Madaxtooyada Somaliland ka soo saaray kulanka Madaxweynaha iyo Ergeyga, kaasi oo isagoo dhamaystiran u qornaa sidan “Madaxweynaha Jamhuuriyadda Somaliland, Mudane Muuse Biixi Cabdi, ayaa  kulan la qaatay ergayga uu waddanka Turkey-gu u magacaabay wada-hadallada Somaliland iyo Soomaaliya Mr. Oglan Baker oo uu wehelinayo wakiilka Somaliland u qaabilsan Turkiga Ambassador Ali Noyan.

Madaxweynaha iyo ergaygu waxay ka wada-hadleen arrimo door ah oo ay kamid yihiin wada-hadalkii dalalka Somaliland iyo Soomaaliya u dhexeeyey, siyaasadda guud ee mandaqadda Geeska Afrika, waxana uu Madaxweynaha Somaliland u sheegay ergayga in wada-hadalladii u dhexeeyey dalalka Somaliland iyo Soomaaliya maaddaama oo aan wax midho-dhal laga gaadhin ay Somaliland dalbanayso in dalalka Caalamku ay qayb ka noqdaan wada-hadalkaas.

Sidoo kale,  Waxa uu Madaxweynaha Somaliland u xaqiijiyey ergayga in deeqaha horumarineed iyo gargaarka dawladda Turkigu ku taageerto dalalka Somaliland iyo Soomaaliya aanay isu dheellitirnayn, sidaa awgeed ay Dawladda Somaliland doorbidayso in si isku mid ah dalka Turkigu uu u qaybiyo kaalmooyinkaas, si uu shacabka Jamhuuriyadda Somaliland ugu muujiyo dhexdhexaadnimo.

Ugu dambayntii waxa ay Madaxweynaha iyo Ergaygu  isla gorfeeyeen xoojinta xidhiidhka labada dal  ee Turkiga iyo Somaliland  iyo taariikhda soo jireenka ah ee ka dhaxaysa.”

 

HIMILOMEDIA.COM/HARGEISA OFFICE

Leave a Reply