SOMCABLE

Madaxweynaha Oo Booqday Danyarta Ku Hareeraysan Dhaamamka Daammi iyo Jig-jiga Yar ee Hargeysa

Hargeysa, 2 Meey, 2018 (Himilo) – Madaxweynaha Somaliland, Md. Muuse Biixi Cabdi, ayaa booqasho gaaban oo uu ugu kuur-gelayey xaaladda dadka danyarta ah ee ku hareeraysan Balliyada Daammi iyo Jig-jiga yar oo ay biyo badani fadhiyaan Shalay gelinkii hore halkaas ku gaadhay, waxaana  uu indhihiisa ku soo arkay baaxadda biyaha fadhiya Ballliyadaas, kuwaas oo u baahan in xal deg-deg ah loo helo.

Madaxweynaha oo ay booqashadiisa uu ugu kuur-gelayey xaaladda dadka danyarta ah ee balliyada caasimadda ku hareeraysan  ay ku wehelinayeen xubno ka socda maamulka sare ee dawladda Hoose ee caasimadda Hargeysa oo uu hoggaaminayo maayarka Caasimadda, Cabdiraxmaan Maxamuud Caydiid (Soltelko), ayaa indhihiisa ku arkay halista ay biyaha Balliyadaas Daammi iyo  Jig-jiga yar fadhiyaa ku keeni karaan nolosha dadka iyo hantida deriska la ah iyo guud ahaan midda dadka caasimadda ku nool, waxaana uu madaxda dawladda Hoose oo iyagu hawshan masuuliyaddeeda u xilsaaran faray inay sida ugu dhakhsaha badan biyaha fadhiya u dhaqaajiyaan, una jabiyaan moosaska biyo-celiska ah, isla-markaana goobahaas laga raro dhammaan dadka deggen, si noloshooda iyo maalkoodaba looga badbaadiyo halis ay biyahaasi ku keenaan.

Ugu horrayn,  waxa Madaxweynaha warbixin ku saabsan sida ay dawlad Hoose ahaan uga hawlgaleen halista biyahaas iyo xalkii meesha lagaga saari lahaa la wadaagay xildhibaan Maxamed Warsame Caalin (Tima-cadde), waxaana uu sheegay inay diyaariyeen cagafyadii iyo agabkii kale ee biyahaas lagu jabin, lahaa, isla markaana ku hawllan yihiin sidii dadkaas meesha looga rari lahaa.

1

Maayarka caasimadda Hargeysa, mudane Cabdiraxmaan Maxamuud Caydiid (Soltelco), oo isaguna halkaas hadal ka jeediyey, ayaa Madaxweynaha hortiisa ka ballan-qaaday inay rari doonaan dhammaanba dadka deggenka ku ah agagaarka balliyada Daammi iyo Jij-jiga yar oo danyar u badan, isla-markaana ay diyaarin doonaan iliiladihii ay biyuhu mari lahaayeen marka moosaska celinaya laga jebiyo, waxaana isaga oo arrimahaas ka hadlaya uu yidhi,“Madaxweyne maanta waxaanu muddo ku siinnay dadka deggen agagaarka Balliga Daammi inay diyaar garoobaan oo aanu meesha ka rarno oo balliga dushiisa la banaynayo, kaddibna balligan oo  magaalada mushkilad ku haya  iyo labada kale ee Xero-digaagta iyo Qudhax-dheerba aanu biyaha ka jabinno oo aanu biyahaas u samaynno Iliilado ay maraan si ay dooxa ugu dhacaan.”

Capture

Madaxweynaha Jamhuuriyadda Somaliland, Mudane Muuse Biixi Cabdi, ayaa kaddib u kuur-galkiisa waxa awaamiir faray madaxda dawladda Hoose ee caasimadda Hargeysa, waxaana uu ku adkeeyey inay sida ugu dhakhsaha badan biyaha fadhiya loosii daayo, isla-markaana loo raro dadka agagaarka balliyada deggen, si loo badbaadiyo nafahooda iyo maalkoodaba, waxana uu yidhi,  “Waxaan idin farayaa cirkii wuu cusub yahay, balliguna wuu buuxaaye in aanay biyahaasi magaalada ku jabin oo la furo biyaha fadhiya, dadka deggenna sidii meel loo geyn lahaa oo khatarta looga badbaadin lahaa aad qabataan, 24-ka saacadood ee aynu joogno daruurtaa taagan, Biyahaas buuxa iyo magaalada waa inaad kala furtaan, ciidankaad doontaanna dirsada”

Socdaalka madaxweynaha, ayaa ujeeddadiisu ahayd, sidii uu xog-ogaal ugu noqon lahaa xaaladda dadka danyarta ah ee ku  hareeraysan Balliyada biyuhu fadhiistaan ee gudaha caasimadda Hargeysa,  isla-markaana uu wakhtigan  xilli-roobaadka ah xidhiidh toos ah ula yeelan dadka ban-yaalka u ah dhibaatooyinka roobku sababi karo.

8B7A9054

Dhanka kale, Madaxweyne Muuse Biixi Cabdi ayaa isla Shalay Xafiiskiisa ku qaabilay Aabbaha dhalay Laba Carruur ah oo habeen saddexaadkii ay qaadeen Biyo Xoog leh oo marayey Xaafadda Qudhac-dheer ee Magaalada Hargeysa.

Aabbahan oo kulanka uu la yeeshay Madaxweynaha iyo Masuuliyiinta kale ee Dawladda la hadlay Warbaahinta ayaa Dadwenaha reer Somaliland, gaar ahaan kuwa deggan meelaha biyo-mareennada ah ugu baaqay inay u dhego-nuglaadaan Baaqyada Masuuliyiinta Dawladda oo ay ka guuraan meelaha khatarta ah, si buu yidhi aanay ugu dhicin dhibaatadii isaga ku dhacday oo kale.

Himilomedia.com/Hargeisa Office

Leave a Reply