SOMCABLE

IRAN Oo Soo Bandhigtay Gantaal Cusub Oo Ay Jawaab Uga Dhigayso Cadaadista Maraykanka

Tehran, 3 Feebarweri, 2019 (Himilo) – Warbaahinta dowladda dalka Iiraan ayaa shaacisay iney Tehran ay xuska sanad guurada kacaanka dalkaasi oo sabtida la qabtay ay ku soo bandhigtay gantaal casri ah oo ay riddadiisu gaadheyso 1,300 kiloo mitir (800 oo mile).

Kacaanka Islaamiga ee dalka Iiraan oo dhacay 1979-kii wuxuu jirsaday 40 sano.

Tehran ayaa waxay sheegtay iney sii ballaadhisay barnaamijyada ay ku samaysaneyso hubka iyo gantaallada riddada dheer iyada oo jawaab uga dhigeyso cadadiska ay Mareykanka iyo Waddamada reer galbeedka dalkaasi ku hayaan.

Sabtidi Shalay, Taliyaha sare ee ciidamada kacaanka Iiraan ayaa shaaca ka qaaday iney Iiraan ay ku qasbanaatay iney sii ballaadhiso isla-markaana xaddigii looga tala galay ay dhaafiso sameysashada gantaallada riddada dheer ayna ku kalliftay cadaadiska waddamada reer galbeedka uga imanaya ayna sii wadeyso ilaa miiska wada hadalka loo soo noqdo.

Wasiirka gaashaandhigga Iiraan Amir Hatami oo ka hadlay munaasabadda gantaalka lagu soo bandhigay ayaa wuxuu sheegay “Gantaalka la soo bandhigay inuu awood u leeyahay isaga oo bad sare ku soconaya uu muddo gaaban ku gaadhi karo halka lala beegsado”.

“Gantalkan lagu magacaabo Hoveizeh wuxuu ka mid yahay bahda gantaallada Soumar oo ay Iiraan sameysay sanadkii 2015-ka” ayuu yidhi Hatami.

Khubarada reer galbeedkana waxay sheegeen iney Iiraan ay buunbuunineyso awoodda gantaalkan cusub ee ay samaysatay, balse uu ka duwanayn gantaalladi riddada dheeraa oo ay horay u sameysatay.

Taliyaha sare ee ciidamada Kacaanka Iiraan qaybta hawada sare Amirali Hajizadeh ayaa wuxuu sheegay “Iiraan oo hore ugu guuleystay iney samayso matoorka diyaaradaha dagaalka ee gantaallada riddada dheer xambaara ayaa waxay haddana ku guuleysatay ayuu yidhi gantaallada riddada dheer oo uu ka mid ah gantaalkan maanta la soo bandhigay ee Hoveizeh.”

Muuqaal laga duubay gantaalka oo tijaaba lagu samaynayo ayey wasaaradda ku sheegtay masaafa dhan 1,200 oo kiilo miitir oo gantaalkan lagu tijaabiyey in lagu guuleystay.

Tani iyo markii ay Iiraan heshiiska Niyuukilarka ay 2015-kii la gashay waddamada ugu quwadda weyn dunida waxay Iiraan sii wadday ballaadhinta Barnaamijkeeda gantaallada iyada oo aan dheg jalaq u siinin digniinta uga Imaneysa Mareykanka iyo Xulafadiisa.

Tijaabada gantaalkan riddada dheer ayaa waxay ku soo beegmeysaa xilli uu Mareykanka uu Tehran uga digay iney gantaal dambe tijaabinin ayna ku xad gudbin heshiisyada caalamiga ah.

Hase ahaatee, Iiraan ayaa sheegtay tijaabada gantaallada ee ay sameeyneyso inayna ahayn mid ku xad gudbayo heshiisya caalamiga ah, balse uu la mid yahay hanashada hubka Niyuukilarka ee ay waddama badanba haystaan

Madaxweynaha Mareykanka Donald Trump oo gabi ahaanba ka baxay heshiiskii Niyuukilarka ee Iiraan lala galay wuxuu Iiraan markale uu ku soo rogay cunaqabateyno isaga oo u sababaynayo iney Iiraan dib u billaawday barnaamij ay hubka Niyuukilarka ku samaysaneyso.

Dalka Iiraan oo in ka badan 20 sano cunaqabateyn iyo cadaadis caalami ahna uu saaran yahay lagana mamnuucay iney wax hub ah dibadda ka soo gashato waxay sii ballaadhisay barnaamijyadeeda ay ku samaysaneyso gantaallada riddada dheer.

 Himilomedia.com/Hargeisa Office

Leave a Reply